返回列表 發帖

#0416 車路士

本帖最後由 ivanfit 於 2017-4-22 12:39 編輯

因賽前呂布說太疲勞所以今場摩連奴先抽起呂布及MK排出一個442陣式,
       迪基亞
華西  拜利  駱駝  達美安
靴    爆炸  普巴   楊格
      褔仔   連
但比賽開始後發覺靴係縮入中間做一個逗位防中, 而華西係照舊打哂成條右路,
而後面的企位似係三個中堅, 所以我會當曼聯排出一個352陣式去比賽.

睇到排陣估計摩連奴會留力歐霸而排出一個防反陣式,
因應車仔有兩個傑出防中簡迪及馬迪, 所以一定會先搶中場.
一開始比賽曼聯係以高位逼搶去搶車仔, 車仔多數由路爾斯持球作進攻第一點,
前面的褔/連會先行去搶逼搶路爾斯或其他持球球員.
車仔過中場後先有爆炸作第一層搶截, 而普巴負責去搶截簡迪或摩西斯,
而靴除了逗位外大部份時間會緊貼夏薩特, 駱駝或拜利會緊纏哥斯達,
而逹美安會負責柏度.
曼聯中場搶到波後會盡快放前比兩個快馬去跑, 而第一球亦係咁樣做成.

開始無耐約5’左右連係左邊搶斷交比褔仔但韃Q射斜.
到8’馬迪推進省中靴垂低既左手因而皮球停係靴腳下,
靴馬上轉身推至中線位置放一個直線繞過路爾斯而到褔仔腳下,
褔仔再推橫去右邊襯比高域出迎射向比高域反方向入網.
一向都知褔仔係中鋒材料, 先前把單箭頭位置讓給呂布見到褔仔唔太適應打邊,
雖然褔仔有速度有腳法但佢唔係善於盤扭的翼鋒,
佢應該係直接打9號憑佢身材速度射術去接應射門的正前.
亦從呢場比賽睇到佢因為先前打開邊路係攝位方面的不足,
先前佢就算係企係正前中軸路但佢迎波會習慣拉出外邊,
而唔會直接推過對手爆入去.
亦因為咁佢既攝位技巧係麻麻, 好多時係攝係對手後面或無第一時間標前.
今場比賽除了入第一球處理較理想之外跟著楊的直線, 拜利直接線及連左邊出波
都睇到褔仔係攝位迎波的處理仍然未到火喉.
所以一定要有足夠上陣機會比褔仔摸索打正前才可以汲取經驗.
褔仔今場有4次盤球過人及全隊9次射門的佔了4次,
還有一樣係摩連奴安排褔仔開罰球及角球可能再磨練褔仔的放波技巧,
從這點可以睇到摩連奴十分睇重褔仔, 希望佢有多些上場機去磨練全盤的進攻技巧.

車仔唔會泊大巴所以有足夠空間讓褔及連去制造機會,
連雖然技術麻麻及走位唔太聰明, 但車仔後防的三中堅有十分多的空位比佢兩個去埋門.
至於是否因為呂布不布陣中而令曼聯球速加快可以講有直接因素,
但呂布的打法係拉出禁區外露出空位比輔鋒或側擊球員殺入禁區,
若配合得好亦可以好快.
只係問題在於對手幾本上預判到呂布走位所以較能有效箝制呂布.
所以現在要因應對手佈陣及人腳去排陣, 但我對摩連奴十分有信心.

今場贏車仔全靠硬及快兩個因素.
曼聯排出五人中場, 中間主要由靴去逗位及緊貼夏薩特,
睇到夏薩特呢類技術型前鋒只要被緊纏便唔能夠做出太多突破及傳球,
而爆炸企前少許先作第一層掃蕩, 所以無論係路爾斯上前或馬迪或簡迪都唔容易運球上去,
爆炸每次出腳好快好多時係中圈已瓦解對手傳球, 搶甩後唔控而第一時間送比靴或普發動功勢,
當然若爆炸有腳法可以自己傳球或運球而唔使每次都做 safe pass必定可以令球速再加快.
至於普巴今場上前助攻的時間唔多, 大部份都逗係中圈位置及主要搶對手最強的防中簡迪,
今場比賽睇到簡迪好似降左級完全搶唔贏或搶到都護唔到波.
而且睇到普巴甚少好似今場咁好落力去攔截, 甚至瞓身去鏟波, 亦甚少見到普巴完全沒有射門.
所以基本上車仔中場完全組織唔到攻勢.
至於右邊的柏度亦被達美安緊逼攔截, 達美安最怕應付高速力量型的對手,
但對著技術型的柏度便掌握得好全場好似只有一次被柏度推過.
兼且前面的哥斯達亦被曼聯一對中堅緊貼, 所以就算有波傳到比哥斯達都唔容易停到波,
所以哥斯達有10次控甩這個甚少出現的數據.
車仔中場係夠硬淨而前鋒把握力亦高, 摩連奴應係最清楚呢點所以先截斷車仔中場,
仲要用人盯人戰術去再減低對手活動能力.
今場比賽另外打得好既又係左楊右華, 佢兩個係兩邊拉左好多空位出黎,
尤其楊係左邊無論傳或自己去都有一定水準, 而唔係馬仔果種一味死去既打法,
除了幫手進攻外楊係防守方面亦好落力去配合達美安去箝制柏度及韋利安.
所以明白摩連奴唔賣楊而利用佢既經驗及技術去打呢種重要比賽,
馬仔應該多點向楊學習點去做一個側擊球員, 再係咁既狀態下季好可能會被賣走.
可以講摩連奴部署適當而各球員亦能夠執行到指令.
還有是車仔全場只有五次射門而全部唔中龍, 我記憶中好耐無見過咁既情況出現.
上半場曼聯的控球是60%, 而各防守球員的防守數據亦十分出色.
最出色的是靴有3次攔截4次搶斷兼有2次key pass,
及爆炸的4次攔截4次搶斷, 而拜利亦打返出季初水準,
另外發覺駱駝十分適合做後防指揮, 佢包位準確之餘亦周時有提隊友補位,
另外從哥斯達刻意推拜利去門柱睇到駱駝處理得好成熟,
因為大家都知哥斯達的挑釁打法所以見到哥斯達還手都只是出口唔出手.
我覺得目前靴絕對有資格做隊長, 至於普巴要再等佢成熟至可以考慮.
因史波及鐘斯應要長抖所以要駱駝及拜利頂到尾之外亦有可能比到機會兩後生仔
Tuanzebe 及 科素文沙.
另外傳會回購被雲高爾賣去般尼的米高堅尼,
米高堅尼係般尼發揮唔錯但回歸曼聯是否能發揮水準亦有疑問,
但礙於史波不穩及鐘斯易傷, 我始終認為兩者只能留其中而有好中堅人選應要再補人.
星期日對般尼便可以再睇辦.

干地可能見到左中場的艾斯比利古達的進攻力唔夠,
亦見到曼聯右邊的華西好多時上前幫手, 而靴縮入中間使曼聯右間有空位,
所以係廿幾分鐘干地安排摩西斯及艾斯兩個調位,
雖然左邊攻力係有改善但其他隊友都被曼聯防守球員緊貼,
就算摩西斯有嘗試去盤扭但作用不大.
到下半場開始無耐便由楊格盤扭入禁區再放波出畸角位的靴快射省中蘇馬入網,
干地唯有求變而由法比加斯入替摩西斯變成433陣式, 估計想增加中場創造力.
但我有疑問為甚麼要抽起有側擊能力的摩西斯,
若想要加強攻擊力為何不抽起一個防中?
再之後肯定見到無兩邊進攻能力於是以韋利安入替馬迪,
我會覺得干地咁做係浪費換人名額, 應該先以法比入替馬迪, 再以韋利安入替艾斯.

下半場曼聯逼搶開始減慢而陣式亦以陣地為主, 所以明顯見到車仔控制返中場,
摩連奴於是係60’由卡域克入替連轉為一個類似4141的陣式,
卡做返最善長的逗位防中, 而靴及爆係中間繼續做掃蕩, 普變成中前場的串連,
而楊亦多留守係左邊以防及後入替的韋利安的進擊.
所以今場可以講贏波關鍵在於領隊部署, 應變及球員的執行力.

睇完呢場比賽大部份人都有疑問就係若抽起呂布令球速加快咁到底能否破大巴呢?
先前已講了好多次要破大巴首先要有盤扭及突破能力的邊或前鋒,
再加上比波走位的默契配合, 再之後就係前鋒拉扯讓出空位射中距離.
今場改為打雙箭頭效果雖然唔錯但始終覺得褔仔未夠火喉及連腳法粗糙.
所以我相信摩連奴係夏天一定會再買有個人突破能力的側擊球員及把握力高的前鋒.

現在係增援方面傳得最響係基沙文, 基沙文主要係後上接應而把握力高的輔鋒,
所以若然係基沙文搭褔仔效果一定會比褔連理想.
但問題呂布下季到底狀態如何及會否離隊是下季買人的一大關鍵,
因為基沙文係後上輔鋒, 而佢唔係有創造力的果種攻中球員,
若然排單箭頭而放基沙文係9號的身後, 咁兩邊要有突破及傳球能力的側擊球員,
而普巴佔左中場一個必出位置而睇到普巴須然落力但係腦入面的防守軟件仍未升級,
咁即係曼聯須要一個如卻奧斯果一類全能防中.
所以我相信若摩連奴今季先排4231再試433再試352再試4141係為買人做測試,
若然佢真係追基沙文的話就肯定要靴再升級與及入一個硬淨有腳法防中去拍靴.

所以現在好想睇再下一場英超對鄰居到底會係點排陣.
鄰居跟車仔有少許相似, 前面有三個快速把握力強的前鋒 阿古路, 沙尼及史達寧.
而中場係有腳法如迪布尼及施華, 與及硬朗的托尼及費蘭甸奴.
但鄰居最弱一環就係後防, 所以估計好大可能用呢個硬+快的陣去打鄰居但又唔可能再用人盯人,
所以最關鍵係曼聯防守球員的搶截能力, 若搶唔斷被打快攻便十分危險.

完成31周之後曼聯60分排第五, 比完成32周的鄰居及33周的18落後分別4及6分.
要追前四一定有可能, 所以睇埋下星期四摩連奴點應付鄰居便知道情況.
至於後晚主場對安德列治必定係一開波便全場逼搶希望盡快入一或兩個保險球.
::: ......facebook!! :::

謝分享
全靠Ching 撐起呢板

TOP

返回列表

重要聲明:本討論區是以即時上載留言的方式運作,Hkvwet.com討論區對所有留言的真實性、完整性及立場等,不負任何法律責任。而一切留言之言論只代表留言者個人意見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。Hkvwet.com討論區有權刪除任何留言及拒絕任何人士上載留言 (刪除前或不會作事先警告及通知),同時亦有不刪除留言的權利,如有任何爭議,管理員擁有最終的詮釋權。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。