返回列表 發帖

#0524 阿積士

摩連奴係有限人腳之下排出一個防守性十分強的4231陣式 :
        羅美路
華西  史波  盲   達美安
       靴   普巴
  馬達   爆炸   MK
         褔仔

而對手阿積士排出一個433陣式但看中前場的六位球員都係攻強於守,
而且只有中場中的 舒尼 係80後, 其他全部都是90後的年青球員,
至於後備落場的三位全都是剛滿20歲.
睇到阿積士係淘汰賽階段的總比數是 16強3:2勝哥本哈根, 8強4:3勝史浩克零四,
4強5:4勝里昂 便睇到阿積士的有前無後打法, 對住曼聯的殘陣必定全力搶攻.
摩連奴亦應該清楚知道阿積士的打法及自身的弱點,
所以必定係以防反部署然後去逼搶對手.

阿積士三個中場 左邊的薛耶治, 中間的舒尼 及 左邊的卡拉臣 都係以快速推進
然後跟兩翼的 尤尼斯 及 車仔借將查奧爾 去做小組希望突破曼聯中後場.
而摩連奴先安排爆炸係中圈開始掃蕩, 而馬達及MK亦十分落去去箝制阿士兩邊
列迪文/薛耶迪 及 韋等文/卡拉臣 的推進,
再加上靴及普巴係中間塞位及逼搶, 華西及達美安的緊逼踼法,
曼聯中後場基本上無空位可以讓阿積士可以用小組打入去.
所以見到大部份時間阿積士係曼聯禁區外圍搓,
兼且睇到阿積士自己有好多次無壓力之下的傳失波或放出界外.
而阿積士的正箭頭 杜堡 亦被史波緊貼而拎波既機會唔多,
摩連奴應知道史波及盲的轉身較慢, 所以要求佢兩人係對方未拎波之前先搶前截斷對手傳球,
再加上靴做一個逗位角色做得非常好所以阿積士好難可以比到致命傳送入曼聯禁區內.
靴用類似對車仔的盯人戰術有大部份時間緊貼阿積士有突破能力的翼鋒 尤尼斯,
所以靴既跑動係覆蓋整個右邊的中後場.
而普巴亦較以往落力多次退回禁區幫手瓦解對手的高波.

曼聯除了係塞位及逼搶落力之餘而後場拎到波都會用長波放上前面比自己隊友,
或者普巴係中場成功反搶之後亦盡快放前, 然後利用前場隊友的個人能力去制造機會.
估計摩連奴用馬達+MK就係睇中佢地的個人技術及用波能力,
起碼放長波比佢地時唔會太易甩, 而褔仔拎波之後通常唔做太多考慮便自己爆入去.
這樣的好處是可以有快速反擊之外亦唔比機會阿積士球員做反搶.
而第一個入球就係出後場傳去右邊的馬達, 馬達回後爆炸再橫傳給娥媚月頂的普巴,
普巴用左腳射向龍門左下角但省到禁區內山齊士的左腳彈高而笠死奧拉拿.
係失球之後曼聯如常縮後, 根本無空位讓阿積士係中間打入去,
而阿積士的一眾年青球員開始心急而唔再做小組, 多次見到查奧爾嚐試自己突破,
今場另一個打得非常好的球員就係達美安, 雖然達美安速度唔快但一向稱讚佢既防守技巧.
係見到查奧爾係右邊做很多突破便盡量先一步去攔截, 或用身體緊貼查奧爾而唔比佢輕易推進.
達美安係季初被山齊士以速度完勝之後有加強操練身體質素,
之後見到係食位或擔對手方面已有顯著改善.

下半場開始見到曼聯球員較上半場積極, 可能摩連奴襯對方未準備好先搶一段,
係48分鐘拎到一個角球.
從龍門後的鏡頭見到MK退回去中圈位置, 可能佢見到有史波及爆炸兩個高佬而唔須要自己,
但從鏡頭中睇到靴推返MK上前而佢自己逗返係中圈位置.
而MK亦跟從靴指示快速返去禁區, 就係呢個動作做成第二個入球.
今季曼聯被人批評其中一點就係角球無效果及完全無死球戰術,
但今個角球睇到爆炸企小禁區頂, 史波係爆炸側幾碼地方, 而普巴係再遠一點的小禁區角,
所以已經有三個高點準備做接應, 而只要落到其中一點必可產生一定威脅,
而落點剛好在史波頭上, 史波用正額點落地彈起剛好在MK前面,
MK便再次利用佢身體的柔韌度用舉起右腳掛落波面而奧拉拿來不及做反應係手頂入網.
今季甚少見到曼聯做到呢種死球戰術, 更加要讚靴推MK返去禁區呢個舉動.
係呢十數分鐘曼聯搶攻的時間可能中場露出較多空位,
而阿積士係整場比賽裡面算係這段時間做出較入肉攻勢,
係62’由尼拿斯入替無甚建樹的杜堡, 但都只係於禁區外遊走.
摩連奴有見及此馬上叫球員退回中後場加強防守.
阿積士再於70’由另一年青球員雲迪碧克入替老將舒尼,
而摩連奴亦係之後的74’以連加特入替MK, 希望以連的活力去阻擋對手,
再之後於84’以馬仔入替褔仔.
馬仔入場後有一次係中圈快腳的彈波比後上的連, 連快速推進形成單刀但被山齊士搶甩.
今場我覺得阿積士的兩名中堅 山齊士 及 迧列治 好有可能成為頂級中堅,
佢兩個的防守意識相當之好, 佢地位置感相當好及係搶波前先搶身位,
所以曼聯球員甚少機會可以爆過佢兩個.
就以上述連的單刀黎睇, 連的足球意識一向唔夠,
凡係自己單刀係推波之後一定要先攝對手後上球員的身位,
只要食左身位就算自己推得唔好都有機會射門或引致對手犯規,
但連明知自己矮細仍然推橫而跟後上的山齊士平排, 從第二個慢鏡中睇到山齊士有出手推連,
但球證史高文拿係另一個方向應該只睇到山齊士用身體擔跌對手而唔構成犯規,
從呢個接觸可以睇到二人球商的分別.
另外甚少見到有後防球員可以擔嬴普巴, 今場睇到普巴被山齊士撞跌兩次.
另一個中堅 迪列治 雖然只係17歲但佢係攝位方面比褔仔老練好多.
先前已講過褔仔可能今季慣常打邊所以往往推波向外側而唔懂得用身體去保護,
多次見到褔仔推波時迪列治而先一步搶嬴身位然後睇準機會搶甩褔仔個波.
呢兩位年青中堅只要多時間落場比賽應可再有進步, 到時必定係各大球會收購目標.
另外褔仔若要升級做正選及頂級9號必定要多向呂布學習推波攝位護波技巧.

今場比賽每位球員都有上佳的發揮, 尤其是 靴, 普巴, 達美安, 爆炸 幾位.
華西保持一貫的穩健, 史波/盲因對手攻力唔夠未受考驗, 羅美路可能比練習還要輕鬆,
馬達/MK/褔仔未算有太出色表現但應該是跟足部署. 連資質所限不能要求太高,
馬仔仍在迷茫中要睇佢個人做化, 肥仔已完成所有任務應可功成身退.

其實今場比賽曼聯唔似得先前幾圈的幸運過關, 而係實至名歸應該拎冠軍.
我睇完比賽第一個感覺就係一班未見過大場面既老虎仔去挑機一班老波骨.
摩連奴係完全洞悉對手的打法而作出適當部署, 利用自己的優點去箝制對手.
控球比率無錯曼聯只係31%, 總傳球只有285次遠低於對手的634次,
而PA更低至67%. 但曼聯的7射有4次中框而有2個入球,
反觀阿積士係有17次射門但只有3次中框而無法轉成入球.
賽後阿積士領隊保斯還心有不忿的話曼聯只懂得用長波所以整場比賽十分悶,
與及今場比賽見唔到真正的阿積士.
這完全係低水平的說法, 比賽的目的係要打嬴對手, 所以必定以自己的長處去攻對方的短處,
而唔係單單要做到華麗進攻去取悅觀眾.
係比賽途中佢既然咁不滿曼聯的防反+長傳但又唔見佢有乜野陣式變動去破曼聯,
不管佢材料不夠或人腳有限, 既然輸左應該比少少風度出黎而唔係講咁低質既說話.
係下半場見阿積士輸左兩球仲係咁搓令我馬上諗起雲高爾.
無錯好多人批評摩連奴只懂防守只識泊大巴一招,
但曼聯係有咁多傷兵及今季先前一共打了63場比賽的情況下必定要保留體力去封阻對手,
所以今場比賽係嬴在賽前部署, 而唔須要打出漂亮足球去爭勝.

除了部署之外亦睇到摩連奴正在改變中,
首先叫所有傷兵就算渣住拐杖的要過去斯德哥爾摩,
落場球員見到自己隊友行唔到都坐係場邊打氣必定令到士氣大增.
另外就算肥仔大幅下滑但仍稱讚佢係曼聯傳奇及所做的決定都是為曼聯著想.
所以剩餘幾分鐘便派肥仔落場令佢可以以隊長身份係拎了 英超, 歐聯, 聯賽盃,
社區盾, 足總盃, 超級盃之後仲拎埋欠缺的歐霸盃.
我自己覺得肥仔唔單止係曼聯傳奇, 更可以講係英超傳奇,
摩連奴呢次可以講幫肥仔風光大葬, 若肥仔識諗應該係呢個最美好的一刻離開曼聯.
若佢真係想最後一次參加世界盃應找一家可以該佢落場比賽的球會去操練狀態.
雖然30萬鎊係猶太佬既錢, 但好肯定有曼迷睇唔過眼佢波都踼唔掂而拎30萬鎊周薪,
咁樣必定會影響佢係球迷心目中的形象.

雖然得到歐聯小組的資格但整體黎講仍是不合格, 稍後係球季總結再分析.
::: ......facebook!! :::

返回列表

重要聲明:本討論區是以即時上載留言的方式運作,Hkvwet.com討論區對所有留言的真實性、完整性及立場等,不負任何法律責任。而一切留言之言論只代表留言者個人意見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。Hkvwet.com討論區有權刪除任何留言及拒絕任何人士上載留言 (刪除前或不會作事先警告及通知),同時亦有不刪除留言的權利,如有任何爭議,管理員擁有最終的詮釋權。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。