返回列表 發帖

#0917 愛華頓

本帖最後由 ivanfit 於 2017-9-18 15:59 編輯

因普巴係周中的歐聯拉傷大腿而用爆炸拍馬迪, 而陣式照樣係4231.
         迪基亞
華西  拜利  鐘斯  楊格
     爆炸     馬迪
   馬達   米希   褔仔
         盧卡古

對手愛華頓係上一場對熱刺的時候排4231唔算有大問題,
但因為用基爾及舒拉達連雙防中而前面三個施格臣/肥仔/卡拉臣都係進攻型球員,
所以中場硬度唔夠所以被熱刺大勝.
今場朗奴高文知道中場質素唔夠曼聯於是排出一個3421防守性較強的陣式,
三人防線前面係拜因斯, 舒拉達連, 基爾及馬天拿, 係硬度方面係十分夠的.
基本上拖肥守得算唔錯再加上曼聯自己多次失機所以於4’失第一球後到83’才失第二球.

普巴缺陣所以馬迪係今場比賽除了要做佢一貫的逗位工作外兼且要負責運球上前,
所以上半場佢好多時開上前面盡量去做普巴的B2B工作.
從上場睇到馬迪狀態有些少下滑但係逗位方面算做得唔錯,
另外睇到佢雖然有一定腳法但運球及做串連並唔係佢強項,
係整個進攻模式感覺係慢及迂迴.
上一個報告才講要求靴盡快提升去補普巴缺陣的不足.
雖然4’馬迪係左邊畸角放長波去右邊的華西射入,
但之後下半場拖肥唔再退縮加強壓逼之後馬迪基本上都只逗係後半場.
兼且華西及楊格年紀大好多時未能趕及回防, 所以馬迪有時逗到好深跟拜利及鐘斯做三人防線.

華西雖然有入球但睇到佢體能真係唔可以支持佢整場比賽走上走落,
已多次見到佢返唔切而右邊出現空位.
賽後摩連奴有講射波並唔係華西強項, 但係練習時有安排佢射中距離.

楊格係左邊的攻力一定比盲好, 但佢亦係多次返唔切後面.
星期三的聯賽盃應該會睇到梳落場搵比賽狀態, 若梳未能係今季回升好大機會被放棄,
若一次過要補兩閘係十分頭痡的問題, 所以摩連奴一直講會比機會梳再次表現自己.

爆炸主要係馬迪前面做掃蕩, 與及係進攻時上前爭取高空優勢,
我個人覺得由最先的莫耶斯到雲高爾都唔知點樣去用爆炸.
爆炸既功能好單一而缺點亦十分明顯.
現在摩連奴要求爆炸唔上腳唔分波這做法去掩蓋佢既缺點,
另外亦睇到爆炸上個球季的下半段係對抗時己減少好多不必要的小動作.
為了盡量發揮佢硬及高的優點係中圈開始做高壓逼搶, 還有係進攻時上前爭頂,
所以好明顯見到爆炸的軟件好似有所提升, 從呢一點睇到摩連奴調較球員係有一定功力.

因為無左普巴所以米希的工作便要相對地增加, 無論馬迪或爆炸拎到波都第一時間交比佢.
先前已講過米希最大缺點係速度唔夠與及唔可以判斷應該放定應該自己推.
係今場比賽便更加明顯睇到佢呢個問題.
以米希的腳法必定可以交出十分準繩的傳球, 但佢多次想自己突破而推埋人堆裡面.
對方的雙防中舒拉及基爾基本上係緊纏曼聯係中路帶波的米希或馬達,
所以曼聯唔容易係中間打入去.
而米希前面若有空位的話佢一定可以自己推入對手心臟地帶,
但前幾場睇到對手已有針對性佈防但米希見前面有人仍然自己推入人堆而被搶甩.
另外佢應知道自己代班做進攻核心係處理最後一腳時應該要更成熟一點.
有一次佢運球而前面褔盧爆前插走位但佢居然挑一個過唔到頭既波而被舒拉輕易化解攻勢,
還有數次無第一時間放波而做錯失直接攻門的機會, 而佢既長波落點亦跟普巴差很遠.
反而馬達係分波方面比米希處理得好很多.
馬達照樣係內切及係中前場不斷走位拉空, 而佢數次造出有威脅傳送只係隊友未能把握.
如先前所講米希+馬達係可以做出較有效率的小組但始終解決唔到無人可以直接盤扭入禁區這問題.
馬達無速度及體型細小所以唔可能要求佢做到呢點,
所以一直話希望米希可以踼得聰明一點係適當時候自己爆入去.
跟先前一樣米希係比賽後段的表現會突然提升, 這個跟對手體能及部署好大關係.
只係對方唔再泊大巴想求勝或體力下降或心急出錯時便有米希發揮的空間.
朗奴高文可能感覺到曼聯攻勢唔夠入肉以為有機會拎一分,
係下半場加強進攻及之後分別換出攔截能力較好的湯戴維斯及基爾,
跟著換入另兩個攻擊球員辛度拉美利斯及卡費利雲.
再之後以米拉拿斯換氣力不繼的肥仔便開始出事.
到83’今場打得頗穩健的威廉斯突然發波瘟傳球比爆炸,
跟著爆炸放前比右邊的盧卡古時米希便即時係左邊的空位前插,
而盧卡古引積基卡及威廉斯埋去包夾之際便放波去左路空位,
本來拖肥後場係夠人的但米高堅尼又係犯了睇波唔睇人的低級錯誤完全無理佢身後入攝的米希,
米希只係好輕鬆的射遠柱入網.
其實我覺得米希並唔係是否適應英超的問題, 而係佢未能判斷形勢而做出適當的舉動.
現在仍未碰上前列, 希望米希可以盡快自我調節去幫球隊爭取更多攻勢.

至於馬達的位置真係最難攪, 馬達一定唔係邊路球員但佢又比連加特好很多,
而中場又無佢既位置所以佢既未來要睇曼聯能否買到一隻正宗右翼.
本來可以考盧推華西上前但目前無另一隻可靠的右閘,
而楊格雖然係右腳但佢打左比打右好, 但由維拉到現在佢打右邊好少望住中間出波,
所以我仍是覺得放返佢係左邊個輪換最適當.
本季都應該會係左邊用翼而右邊繼續內切.

今場褔仔可以用迷茫黎形容佢, 上半場佢多次想自己爆入去但係推波前無先食身位,
或無做任何護球動作, 無記錯上半場佢有四次自己推但都被對手撞跌之餘對手係無犯規的,
佢係左邊見前面有米高堅尼右邊有馬天拿而仍然夾硬推, 佢未起步我都知佢一定甩,
除非佢兜後否則無論佢推去邊個方位個波都一定係對方控制範圍之內,
佢係完全無護球意識.
要到下半場舒拉逼去左邊褔仔跌低球證才吹罰舒拉第一次拎到罰球.
還有講左好耐若要做考慮必定出問題,
例如有一次佢係畸角位望空抽射居然可以抽左去遠柱之外十幾碼底線.
一直講褔仔最欠缺既東西就正正係呂布的強項, 若然呂布可以一對一教褔仔必定可以升級.

到61’連換褔仔照樣打左邊, 連無錯係好聽指揮係中前場到處跑去拉空,
但佢意識又係比較差好多時走去對手身後邊, 與及佢腳法粗糙及對抗性差未能做成好大威脅.
無錯佢有時會入波係因為只要對手有一次跟唔切佢便比機會佢望空起腳,
但連的把握力都好唔過其他人好多, 所以好間中才有一個入球.
當然佢肯聽指示又有速度係領隊好喜歡用的球員, 而球隊亦須要有呢一類球員做換補.

到77’靴入替馬達, 靴企攻中位置而米希去左邊連去右邊.
靴落場後基本上無太多參與進攻, 因應朗奴高文換入兩名攻擊球員,
所以靴大多時間逗係兩個防中前面作第一層攔截.
而之後的大勝全因對手犯錯及戰術調動所致.
若然朗奴高文照排返防反陣式曼聯唔好講拎三分, 絕對有機被對手反擊失球.
到入左第二球摩連奴順理成章換馬仔出黎再去衝擊對手後防,
摩連奴一反過往模式不管嬴幾多球都要求球員盡力再爭取不可以玩波等完場,
所以才出現上場歐聯對巴素爾係領先之後球員開始玩腳法被摩連奴批評像打機.
我一直認為應該馬仔做正選到末段才派褔仔再衝一輪.
今場睇到馬仔的盤扭能力, 佢襯拜因斯向後退而威廉斯未及出腳時便變速從人隙中推過,
跟著馬仔拐過想攔截的舒拉而舒拉跌低而伸出來的左手剛好碰到馬仔想交給連的傳球,
這個好肯定係12碼.
若然馬仔真係恢復信心我認為打左邊的話佢應優於褔仔.

再講盧卡古好多人認為佢係一個無腦的波牛但我唔太認同.
無錯佢係以力度及身體質素去取勝, 但佢又唔係完全唔用腦去踼波果種,
只可以話個人技術未到頂級前鋒那種級數.
但佢又真係好努力所以感覺佢好多時射失但又有好高既入球數字.
就如上半場門前失機那一球, 馬達截到舒拉的失誤而放前比盧卡古,
盧卡古並沒有硬射而係先拐過威廉斯再襯碧褔特出迎時想用左腳熨遠柱,
佢這個射門頭一半動作可以講拎滿分, 但就係佢柔韌度唔夠, 擺唔切腳碗落唔到西,
最後好似硬射咁直線柱邊出界.
跟著下半場有一球楊格放入禁區積基卡漏頂但盧卡古唔係第一時間抽射或撞射而係用心口去控,
凡係要控定以盧卡古被人批評多年既first touch能力真係唔知會控左去邊,
結果係好正路心口控落地但居然彈起高過頭所以盧卡古跟積基卡高空腳撞腳.
情況即如盧卡古迎波好多時會彈離身兩三碼之外.
其實柔韌度及迎波控球一定可以練到, 而家就要睇盧卡古係落課之後肯用幾多時間心機去操練.

今場比賽前摩連奴已提出會給最大的尊重比回歸奧脫褔的肥仔,
唔知係咪咁原因見好多曼聯球員對住肥仔無高壓的逼搶而係任由肥仔繼續做功勢,
肥仔雖然體能大幅下滑但佢意識仍在, 尤其是係無波走位跟入去禁區的慣性動作.
下半場開始無耐有一次佢前插入禁區拜利無硬朗攔截而鐘斯亦無跟佢入小禁區,
幸好迪基亞無夢遊.
另一次同樣係肥仔及施格臣一齊衝入禁區, 鐘斯又係企係度睇無跟入去,
幸好施格臣爭射力度及方位唔岩再次被迪基亞救到, 若係由肥仔射機會應該會大好多.
可能上場因為拜利及鐘斯既失誤導致心理壓力過大而今場比賽以佢地既表現係唔合格的.
希望今場只係因肥仔回歸這個特別案例而打後可以回復正常.

總括黎講今場比賽雖然大勝但我認為只是剛好合格.
只係對手把握力唔好及後段心雄想追和以致後場露出較多空位才有機會臨完場前連入三球.
若對手表現好一點好大可以繼上場之後再次被逼和.
都係果句希望佢地係調整心理質素之餘然後係射門訓練方面落多一些功夫.
::: ......facebook!! :::

返回列表

重要聲明:本討論區是以即時上載留言的方式運作,Hkvwet.com討論區對所有留言的真實性、完整性及立場等,不負任何法律責任。而一切留言之言論只代表留言者個人意見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。Hkvwet.com討論區有權刪除任何留言及拒絕任何人士上載留言 (刪除前或不會作事先警告及通知),同時亦有不刪除留言的權利,如有任何爭議,管理員擁有最終的詮釋權。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。