返回列表 發帖

#1021 哈德斯菲

本帖最後由 ivanfit 於 2017-11-2 13:50 編輯

其實今場比賽跟上一場對18的形勢有相反亦有相似的地方,
但兩場都具備頗多的輸波因素.
相反的地方在於上場主場的18係壓住曼聯攻, 控球係62/38%而射門係19:6.
主隊排出433陣式而三個中場安尼簡, 軒達臣及雲拿杜姆高壓逼搶曼聯中場,
再加上前面三隻有技術的快馬古天奴, 費明奴及沙拉係對曼聯後防作出很大威脅,
所以靴及馬迪大部份時間係塞係後面唔比空位對方係中間打入去,
另外18兩閘摩蘭奴及高美斯出擊能力十分強, 所以楊格及馬仔都好多時要回防塞兩邊,
再加上無人有能力或有機會放到準繩的長波或直線上前所以上一場基本上係無辦法去攻對手.
而今場係未失球前曼聯已經係壓住對手, 控球係一面倒的22/78%,
但跟上場相似的時方係有形勢但無入肉攻勢, 射門只係略為佔優的5:9.
即是說無論曼聯的形勢是否佔優但攻勢都係無效率.
曼聯目前有幾個大問題而其中一個就係靴跟馬迪的功能太過接近, 兩個都係逗位防中,
因為咁原因除了無左一加一大於二的效果而好多時分工不清, 兼且係無人去做串連,
所以曼聯中場一受壓便可能出混亂.

上場比賽後一些名宿如舒米高/約基及一眾英媒都喪插摩連奴唔應該泊大巴,
大家都知道18一向的戰略係要一季裡面雙殺曼聯及拖肥,
以前好多曼聯球員都講到係比賽前通道裡面18球員已表露仇視眼神,
所以18每對呢兩隊係充滿鬥志底下會比平時有較突出的表現, 呢一場亦唔例外.
若然批評的人真係有認真去睇呢場比賽就知曼聯係攻唔到, 兩個防中係防守工作已應接不暇,
根本無辦法/能力去策動攻勢.
另外兩邊中場亦要回防幫手塞邊線, 有機會上前進攻既時間亦唔多.
上面亦講到米希狀態低迷基本上負擔唔起組織攻勢既工作,
而前面既盧卡古並唔適應打柱躉做支點既工作, 要有空位有隊友跟佢配合才能發揮盧卡古既功能,
若要佢揹住對手做大量轉身突破或推橫搵空位射波佢根本上係處理唔到的,
再加上佢一向的差勁first touch好難要求佢跟隊友做小組.
所以只係於上下各半場的尾段襯18球員回氣才多返一些控球但都做唔到入肉攻勢.
其實我都好想問那些高人係喪插之後能否提供一些專業意見係咁既情況下應該點樣去做攻勢.

從上場已睇到馬迪有疲態而米希欠比賽狀態, 因些上一場曼聯係具備輸波的因素,
而唔使輸的最大主因係對手把握力弱,
不管是古天奴或費明奴或沙拉都多次控甩及浪費射門機會.
但今場哈德斯菲但把握到曼聯兩次犯錯而兩次都處理得十分好.

唔知米希係因為比賽頻密疲勞定還是狀態不足影響判斷,
佢唔理前面是否有空位或對手有多少人佈防, 佢仍然照樣推入人堆中,
所以多次被對手搶甩或係被搶甩前倉促放波而交失.
今場比賽前我已經估摩連奴會否擺連打10號, 因為摩連奴曾講過佢極度讚賞連聽話及多跑動.
開賽排陣如下:
        迪基亞
華西  史波  鐘斯  楊格
      靴     馬迪
  馬達  連加特  馬仔
        盧卡古

我好明白呢一班曼聯球員最大問題係少跑動及唔太願意做無波走位的配合,
所以摩連奴見到拉唔散對手時會用腳法粗糙身材矮細的連加特做攻中,
無錯連會按照領隊指示係中間做大量跑動試圖拉散對手,
但佢好多時走去人堆或走到對手身後而唔能夠做出效果,
有時襯對手未能看管好連係有機會走到空位, 但佢的放波能力實在太差,
今場亦見到佢多次放錯比對手.
我係好欣賞佢既勤力但佢既能力真係應付唔到打10號位,
我反而覺得佢應該把活動範圍放係右邊, 利用既速度去做拉扯或落底,
現在曼聯右邊可以講係半癱瘓, 對手十分容易去防曼聯的右邊.
見到今場係右邊出個較似樣的只有盧卡古助攻的一球.

而比賽開始算係正常, 雖然作客但對手打防反所以曼聯不斷嘗試搵空位.
而轉捩點就係鐘斯傷出, 對著鐘斯真係唔識點批評佢, 佢無錯係十分熱血勇捍但經常神經大條,
佢追出去右邊係正確但只須踼波出邊線或省落對手出界便可以,
見到標波但又好似反搶唔到已有不良預感, 佢自己柔韌度唔夠經過多次轉身反搶而最終扭傷,
佢雖表現出十分不忿但我覺得係自己攞黎, 佢唔算靈活就唔應該做咁多高難度動作.
而家仍未知佢傷勢是否嚴重.

再講另一問題要佩服摩連奴的計算, 雖然有人不斷批評為何有貴價中堅唔出但佢只答未ready,
情況就如上季的米希一樣, 因為英超的逼搶壓力實在太大而埋身肉搏的時間亦十分多,
睇過連迪路夫係歐聯比賽覺得佢係傳統歐陸技術型中堅, 腳法唔錯但對抗性真係差少少.
佢今場未準備好除了失第二球佢錯判迎波時間之外亦睇到佢未太入局,
馬達傳失波之後佢知道係後面仲有史波便應該技術犯規去停止因斯的推進.
其實第一球唔應該失的, 當然無人知射波省中迪基亞反彈到摩爾腳下,
但馬迪犯了睇波唔睇人的大忌, 佢跟入小禁區但完全無為意佢身後幾碼的摩爾.
至於失第二球這種預判錯誤都經常發生係曼聯其他隊友身上, 尤其洛河, 鐘斯及盲,
只不過呢次導致失球連迪一定會被喪鬧. 另外又唔知點解迪基亞佢走到咁出去封位.
真係估唔到連未ready 呢個極少出現既因素都齊備輸波真係無話可說.

上面已講過雙防中無火花但我仍覺得摩連奴排陣過於保守,
既然對方攻力唔強就無須要兩個平排企, 雖然失波後推馬迪上前做分波,
但我發覺馬迪算全面但仍是守強於攻 (呢個係上季被車迷插的主因) ,
佢係分波時有點猶疑而未能係第一時間放波去適當位置,
與及好多時就算馬仔/褔仔左邊有空位佢都照樣放入中軸位置.
仲有係佢完全疲態畢露, 除了放錯波還有多次無謂標波及失位,
其實我覺得佢跟靴應該對調, 靴既長波雖然麻麻但佢有放直線既能力,
兼且用佢有體力應做第一層攔截而讓馬迪安心逗後.
靴既問題先前已有提過, 自從雲高爾嫌佢太多直線入禁區而雪完再要求佢打搓控為主之後,
佢既進攻能力好似大幅減弱, 再加上上季摩連奴安排佢打逗位防中更加令佢放波能力倒退,
好多時見佢有波都係橫傳或回後比中堅(應該係摩連奴要求), 偶爾才有一兩球直線,
跟以往畢爾包比較靴既進攻軟件好似完全被刪除一樣.
反正現在普巴/馬迪係正選那為可仍要限制靴的踢法?
仲有係靴做逗位所以佢的中距離射門比我感覺係寧可射失都唔可以比對手截到打反擊,
所以多次見佢射中距離有點求其, 我唔認為靴的射術係差成咁.
我建議唔一定要限定靴只可以係排三中中時才用佢,
係盃賽須要進攻時或以佢代替普巴去做進攻第一點,
否則再咁落去靴既功能只會係不倫不類而只可以做大後備.

到呢一刻英超四個失球都係球員無謂犯錯完全係預計之外,
開季到現在我覺得摩連奴真係用好多時間去部署防守,
但係進攻方面就睇唔到佢有太大的過人之處.
先前的比賽都係耐心先防守好然後等對手犯錯而取得入球, 係進攻模式上係無太有效率的方案.
上場對18因對手中堅路夫雲及馬迪普有水準表現所以完全比唔到威脅對方,
上星期作客賓菲加亦因對手有紀律而有攻勢唔入肉,
係等到對方年青守門員犯錯才可以入一球取勝.
到今場落後無錯係瘋狂進攻但完全搵唔到方法射門, 中前場人多唔一定代表做到攻勢的.
到下半場褔仔代馬仔米希代馬達後連奴排一個352陣式,  
連迪改打左中堅, 史波係正中中堅, 而靴退落右邊打右中堅,
華西及楊格理所當然的推上前做翼衛.
係要到中段才踼返一個只有史波及連迪係後面的4231或2431.
無錯馬迪. 連, 米希三個係前場不斷跑動搵空位, 但我覺得係亂跑居多,
而褔仔好多時間企係畸角做一個內切翼或輔鋒角色去支援盧卡古.
人雖然多但放波呎吋差及中軸塞車所以完全搵唔到空位射門,
有波多數放去兩邊傳中但上面已講過盧卡古係前場停波能力唔高,
反而到盧卡古去右邊拎波傳中而輪到對手犯錯睇波唔睇褔仔才能破蛋,
其餘記憶中真係無乜邊次傳中係有威脅.

今場比賽雖然輸波我反而唔會插摩連奴或一眾球員,
馬達回中場拎波都好正路但咁岩果一刻兩個防中都少有地上左去,
馬達呢球控得係差少少但我認為佢身位及速度係致命傷.
馬達對抗性唔夠被搶甩而導致輸波兩季前對被李城反勝已出現過,
呢個係佢既身體質素導致問題出現, 跟技術無關.
有邊個會諗到鐘斯會突然上腦自己扭親要咁早階段用一個未ready既替補.
連迪路夫又真係未得, 而佢果下失誤好多曼聯守衛都犯過同樣錯誤只係唔死得.
其他人因體力, 狀態, 能力, 打法…..問題無表現都唔可以話佢地有大錯.
若然要問責唯有要摩連奴揹哂, 因為佢真係表現唔到有合適既進攻模式比我地睇,
之前來來去去都只係用爆炸做plan B, 大多時間都好似係叫班球員自己攪掂.
仲有係上季遇對手泊大巴便無符就唔應該再比佢地攪到中場大塞車,
尤其連及米希應該要離開中軸位置.

到現在有幾個問題頗難解決 :
一係無人可以做到普巴那種反搶, 護波, 運球上前及分波的工作,
二係除馬仔外無人有個人突破能力去撕破對手防線,
三係兩邊唔協調, 右邊仍要靠出波能力減弱的華西一個打哂, 而左邊無閘上前支援,
    楊格算係最有能力一個但年紀已唔容許佢太多上前.
四係攻中位人多但無一個有效率做到分波, 入攝及後上射門的工作.

若然猶太佬覺得比列鍚係疑似水貨兼唔想做水魚咁巿場上真係無乜人可以買得落手.
攻中方面前排因奧斯爾傳聞有跟人討論過, 若佢打返皇馬及國家隊時的表現係可以幫到曼聯,
但諗深一層摩連奴要求全隊球員都要參與防守而奧斯爾欠缺積極性又好似唔太適合,
兼且目前睇到佢係阿仙奴因唔知甚麼原因有毫無鬥心既情況出現,
難保有日佢過黎奧脫褔亦因情緒問題而再次出現hea 踼情況.
除非摩連奴保證如馬迪一樣球員手冊在佢手而其他領隊唔識用佢地, 若然係咁唯有支持摩連奴.
至於梳爾據聞係預備組比賽仍未達標估計佢心理障礙仍然對佢有極大影響,
若然係今季內的盃賽都未能回復水準睇怕都要被放棄, 現在情況危急更加唔敢用新人米曹.
至於右閘更加要搵人接華西班, 華西頂多只能頂埋今季, 下季一定要輪換.
但目前曼聯仍未返回爭冠行列所以要招引大名加盟有一定難度,
現在唯有要求摩連奴出盡十成功力以陣式去發揮各人的小宇宙,
希望英超可以緊貼鄰居拿到一個較好的位置, 而盃賽就要出盡力去創造奇蹟.

除了技術戰略問題之外球員的球商及心理質素亦唔夠, 我唔知摩連奴有無係呢方面下功夫,
若然無專家可以去做就索性重播一些以往落後反勝對手的片段要提升各人鬥志.
尤其今個星期更加要重播01/02球季第一循環作客白鹿徑,
上半場落後3:0而再睇多幾次下半場點樣去反勝3:5.

另外當然要提昨晚的熱刺對18, 我睇左部份比賽發覺昨晚的18跟對曼聯的表現有一些分別,
前場係快速推進而中場仍然係高壓逼搶, 但普捷因為夠人手所以排一個352陣式去應付,
中場完全唔輸比18.
但18的後防就完全降左兩班, 路夫雲+馬迪普及米奴列簡直錯漏百出,
兩閘摩蘭奴及高美斯好多時返唔切做防守.
熱刺跟曼聯的分別在於熱刺中場反搶成功之餘更加以放準繩直線比前面的哈簡及孫興民.
但曼聯的中場反搶有困難而搶到都無人可以放到到位既波上前.
今個星期六主場對熱刺要睇下普巴/爆炸/卡/拜利/鐘斯有邊個出得返,
若然五個都唔出得咁就就算被自己曼聯鬧爆都泊貨櫃451求一分.
昨晚的比賽可以睇到哈簡的靈活性, 佢先用速度擺過兩個防守球員再推大位射入,
我認為盧卡古想做頂級前鋒一定要練習點樣係揹住對手情況下去擺脫對手做突破或轉身搵位射門,
若然對手防守能力強紀律性好無可以下下比到空位盧卡古去作衝刺,
這個就係我一直批評盧卡古對前列球隊無法入到波既主要原因.
同埋唔該摩連奴盡快搵個體能教練幫佢練好柔韌性, 這對佢改善first touch亦有一定幫助.
佢等如一隻大拖頭有大直路比佢爆一定好快但若要佢入手臂彎人地到終點佢都仲未出到黎.

至於明晚的聯賽盃就應該派部份青年軍上場, 主力收得就收,
睇下搏唔搏到有一兩個有好表現稍後係有須要時用黎應急.
::: ......facebook!! :::

返回列表

重要聲明:本討論區是以即時上載留言的方式運作,Hkvwet.com討論區對所有留言的真實性、完整性及立場等,不負任何法律責任。而一切留言之言論只代表留言者個人意見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。Hkvwet.com討論區有權刪除任何留言及拒絕任何人士上載留言 (刪除前或不會作事先警告及通知),同時亦有不刪除留言的權利,如有任何爭議,管理員擁有最終的詮釋權。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。