返回列表 發帖

#1118 紐卡素

本帖最後由 ivanfit 於 2017-11-20 13:55 編輯

首先想講一下最近三場對前六的大戰分別是勝負和各一的問題所在.
對18果場比賽之後好多球評家或球迷鬧摩連奴為何唔攻只識泊大巴,
若然真係有認真睇果場比賽就知曼聯係完全攻唔到.
18主場對住曼聯就必定出足十成力, (跟之後18輪比熱刺就睇到個分別)
馬迪及靴極其量只是可以抵擋18的高壓逼搶而唔可以運球上前,
而兩邊的楊格及馬仔亦被對方的摩蘭奴/安尼簡及高美斯/雲拿杜姆逼到上唔到去,
係要到上下半場各尾段18回氣才可以拎返多一點控球權.
再加上米希仍是一貫的迷失所以前面的盧卡古只可以企係度或返後幫手做攔截,
幸好18的沙拉/費明奴/古天奴不斷浪費機會, 賽和0:0可以講係最好既結果.

到對熱刺因對手有前鋒哈簡缺陣可以講對熱刺做成十分大的影響,
有哈簡係前面停波, 二傳或做接應係佢身後的迪利阿里及艾歷臣可以做出十分多有威脅攻勢,
今場睇到前面只有孫興民只要曼聯做好包夾咁後面的阿里亦好難做到配合.
(亦可以睇返18對熱刺阿里及艾歷臣的走位及入攝)
曼聯防守好之餘亦因一次快速突擊迪基亞長波比前場盧卡古再頭鎚二傳比馬仔單刀,
因為艾達維列分心後上的連加特而沒有第一時間去攔截馬仔令馬仔可以突出少許而單刀射入,
亦可以講係穩守之餘再把握對手一次小錯誤而致勝.

到作客史丹褔橋若然用對上兩場那種泊大巴防反打法應可以各取一分.
排343陣式都唔算有問題但開始比賽睇到三個中堅逼到好前已有不良預感, 甚至去到中圈逼對手.
我好明白上季摩連奴返去史丹褔橋第一場因為史波發波瘟而大敗可能想盡最大努力作客嬴波.
但佢唔記得上次教訓係自己後防走甩對手而令信心大失導致大敗.
若要史波貼身看管對方柱蠆中鋒係無問題, 但佢最怕靈活快速的前鋒.
我唔知摩連奴的防守系統到底點樣安排人去看管前插入自己禁區的對手,
當時拜利看管自己右邊的阿朗素, 而史波好似唔知自己身後有個莫拉達入緊禁區,
佢走左出去準備封禁區頂的艾迪巴約, 但馬迪亦都只係慢步返回禁區而沒有全速去追艾迪巴約,
呢一個失球係全個防守系統出錯所致.
中堅唔使講一定要保護好禁區, 絕對唔可以比機會對手係禁區內無人看管面對守門員,
若發現有對手從禁區外衝入黎唔係自己出去攔截, 而係馬上指揮隊友去補位.
落後比車仔要追平並唔係一件容易既事, 呢班曼聯球員心理質素唔夠只係亂咁走,
對住質素唔差兼刻意防守既車仔最後輪波係意料中意, 除非對手犯大錯誤.

今場比賽有普巴復出及第一次排盧褔馬正選 :
          迪基亞
華西  連迪路夫  史波  楊格
     普巴         馬迪
  褔仔     馬達     馬仔
           盧卡古

今場的比賽數據無乜參考價值, 但可以給幾個問題提供一定的答案.
首先講一下失第一球, 呢一球個責任唔應該全放係連迪路夫身上,
而係整個防守系統失當所做成.
摩連奴一向要求兩閘要逼得好前盡量唔比對手有機會係兩側爆入去,
呢一次係楊格走甩耶連比佢係右邊爆落底線, 史波見左邊無人馬上出去左邊封位.
係呢個時候已經有四個紐卡素球員衝入禁區, 華西釘返自己右路的對手,
咁即係話連迪路失要移向中軸線面對三個對手, 另外馬迪及普巴仍在禁區外緩慢行緊入禁區.
耶連落底一般中堅正路思考會認為佢出高波, 所以佢一路走去小禁區準備迎頂係正確做法,
點知史波未能完全封阻出波路線比到空位耶連出個地波回後去12碼位置.
其實摩連奴要求兩閘咁去防守就一定要比足指示兩個防中要緊貼正在前插入禁區的對手,
否則只會比機會對手out number 自己守衛而製造危險.
呢一球失球我第一個鬧會係馬迪, 佢既責任應該係跟貼杜韋基爾入禁區,
若然佢認為連迪路失一個人可以對抗三個對手我只可以講佢突然思覺失調,
就算連迪無跣腳佢都未必能夠阻擋呢個射門.
情況跟對車仔的失球一模一樣, 點可能一而再再而三犯同一錯誤?????
呢一球絕對係防守系統既反面教材, 我認為要特別開課專題討論以避免重複發生.
其實呢一場比賽紐卡素的突擊亦十分有威脅, 只係限於對方質素未能把握,
總之任何防守系統都一定唔可以像前幾季的曼聯中軸線永遠有個大窿比人任意射門或爆入去.

另外我一直認為連迪路夫係歐陸式技術型中堅, 佢到呢個時刻仍未適應英超係好正常,
但可以睇到佢捉路包位及出腳係非常準確, 佢好少會失位被對手騙過,
頂多只係身體質素唔夠而被對手撞跌.
若要改善一定身要健身房操體能, 另外係要再加強預測對手走位的能力,
因為將來發展佢應該係包波型中堅, 而殺波工作應該由拜利去做,
只要連迪能盡快操好體能及心態, 有足夠比賽去鍛練佢之後必定好過鐘斯及史波.
再講返鐘斯真係好難預測佢幾時出大事, 點可能友誼賽都打六支止痡針頂住照落場,
呢種無謂比賽有痡應該照直跟修夫基及軍醫講, 就算修夫基要求佢打針都應該馬上拒絕,
而家傷上加傷都唔知要抖幾多個星期.
另外史波呢類慣性發波瘟既又係唔知佢幾時發作,
上一場佢好似係完全唔知莫拉達係佢後面自己移去左邊,
中堅最大規條係凡見到有對手走入自己禁區而沒有隊友去包夾一定要埋去緊貼對手,
而再指揮附近隊友去填補自己位置,
史波年資最長但一直做唔到大佬除左佢無積極指揮隊友佈防之餘好多時自己會走甩對手.
今場係無關痡癢位置攔截時踏落對手腳脛若球證係果刻認為佢係意圖粗野攔截係可以直紅出場,
仲有係佢每犯錯都會擺出一副無辜既表情即係代表佢係唔知自己錯係邊.
無錯當須要佢緊貼對方柱蠆前鋒時佢係做得唔錯, 但佢既慣性跳制會令領隊唔敢擺佢係正選.

普巴復出睇到佢係攔截/反搶之後的運球上前既技巧係高於馬迪唔止一班,
佢係先護球而唔係靴果類習慣即刻比波跟住走位既中場, 當然靴都可以放到靚直線比前面,
但若對手有兩三個埋黎包夾普巴係可以鬆容擺脫對手再放波比處於適當位置既隊友.
從第一球便睇到佢既大局觀, 冷靜及技術, 佢有某些程度似簡大帝係等到適當時機才放或射.
普巴在陣應對盧卡古呢類不善於走靚位既前鋒有好大幫助,
但我仍然嫌現有的曼聯球員係無波在腳下走位唔夠多及唔夠靈活,
今場比賽唔使睇數據都知全隊以馬達走得最多,
有速度有身材果班唔走要由最矮最慢果個去走係完全不合邏輯的,
所以一直講若摩連奴真係教唔掂點去進攻便要由助教負責或另聘高明.

再講返盧卡古個問題, 多次見到隊友放波比盧卡古係唔到位或過左頭,
到底係隊友放波落點差定還是盧卡古無走到靚位呢?
我個人覺得盧卡古好多時以為自己身體質好便專係走去人堆中等波,
放波果位隊友正常唔會放去人堆中(除非角球)而係好似楊格助攻第二球咁放去最遠柱以避過對手,
而史波剛好從後插入去遠柱便輕鬆頂個柱邊波入網.
我前日至提出一個問題, 若呂布跟盧卡古兩個同場應該點樣擺位,
我覺得盧卡古既然唔識揹住對手做野咁就唔應該打9號,
應該讓個9號位比懂得點去揹住對手停波或二傳, 傳身突破或射門的呂布,
而盧打返佢係拖肥時那種走位型輔鋒角式, 咁樣反而多入波機會.
連下游紐卡素既尼祖尼及奇勒都可以完封盧卡古 (除左第四球),
可想而知佢對住前列既高質素守衛入唔到波係好正常.
盧卡古既優點係有身材有速度而缺點係first touch 差停唔到波及把握力唔高,
所以佢唔應該企定定係禁區等波, 而係要係多走動搵空位射門及拉邊讓隊友前插,
第三球佢拉邊出波讓出空位比隊友後上及第四球唔須要多考盧一心爆入去便可以發揮佢既長處.
呂布係77’入替馬仔之後便做出一個類似4231--->433的防反模式, 盧係右邊褔仔係左邊,
咁做反而有呂布做支點而盧及褔少左亂咁走既情況.

另一個問題係先前一直有討論到底盧褔馬三隻快馬同場會否係有大於三的效果呢?
從呢場第一次盧褔馬同時正選便知道是唔可以的.
首先褔及馬習慣打左邊輪換, 而褔打右邊除左唔適應之外佢亦慣性走去左邊拎波,
咁除了左邊做成塞車之外普巴亦要移去右邊跟華西一齊做波(如第一球),
而中間的盧卡古唔夠跑動的話咁對手打陣地便好容易防守曼聯,
亦都係要等到普巴利用個人技術第三時間放個遠柱波比馬仔輕鬆頂入,
否則上半場都唔知能否追平或反先.
褔及馬兩個習慣係左邊等波, 而唔係好似鄰居或18的側擊球員前插走位接應.
還有佢兩個雖然有速度但唔係可以長距離一個爆幾個咁做突破,
佢地最有威脅係盡量貼近禁區頂然後做小組或變速拐過對手射門,
但若對住高質素對手或遇上泊大巴咁做好難咁樣打入去.
所以我仍是建議褔馬互換, 除非佢兩個突然開竅.
睇到摩連奴想安排褔仔多放波及去處理大部份死球, 但佢到呢一刻仍未達標,
好似上半場馬仔走前但褔仔放波去馬仔身後十碼既地方但又唔到馬達腳下,
浪費左一次可以做成單刀的機會.
下半場開始摩連奴安排褔仔打10號位, 馬達去返右邊,
我估計係想利用褔仔的身材, 速度及射門能力係中間做突破,
這個構思係好但到呢一刻褔仔仍未學懂怎樣去利用身材去攞位及護球,
好多時佢想拎波果刻已被對手截斷, 講左好多次佢既缺點正正係呂布既強項,
我好希望係課餘呂布能夠多些題點盧褔馬點去進攻.
至於褔還是馬打正選就要睇對手排陣, 若然對手係搶攻型咁應該褔正選先去搶散對手,
到攻唔入或褔仔無力便由馬仔後備入替.

呂布係目前最適合打9號但畢竟佢已36歲無可能打足餘下所有比賽,
所以到底要點去安排盧卡古的打法及兩側點去配合是現在重點考盧既事情.

而家好明顯睇到季前摩連奴一直死追比列鍚係有原因, 而家右邊雖然係有人但無效率,
所以下季入一隻可做突破的翼鋒係十分急切.
到時馬達可能會被賣走.

到呢一刻雖然摩連奴放好多時間去編排防守但偶爾仍出現漏洞,
而雖然話只有六個失球20隊最少但呢六個失球全是低質錯誤所致,
曼聯係進攻點已經不及其他前列, 若然防守系統仍未攪好真係唔好講重奪英超,
就算要爭前四都有一定難度.
星期三作客巴素爾應該要輪換, 因為之後兩場英超對白禮頓及屈褔特一定要全取六分,
最好能夠大勝以增加信心於打後兩周作客阿仙奴及主場對鄰居的大戰.
::: ......facebook!! :::

返回列表

重要聲明:本討論區是以即時上載留言的方式運作,Hkvwet.com討論區對所有留言的真實性、完整性及立場等,不負任何法律責任。而一切留言之言論只代表留言者個人意見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。Hkvwet.com討論區有權刪除任何留言及拒絕任何人士上載留言 (刪除前或不會作事先警告及通知),同時亦有不刪除留言的權利,如有任何爭議,管理員擁有最終的詮釋權。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。