返回列表 發帖

#0101 愛華頓

本帖最後由 ivanfit 於 2018-1-4 14:50 編輯

因應有受傷及停賽今場雖然係常用的433但人腳組合係第一次出現.

           迪基亞
連迪路夫  鐘斯  洛河  梳
      靴    馬迪   普巴
     馬達   馬仔  連加特

先前摩連奴有講過若非盧卡古行唔到否則一定會擺佢係正前位置,
雖然大家都睇到褔仔及馬仔都係正前材料, 但佢兩個仍未給人有十足信心去做正前的正選.
盧受傷必定要變陣而按今季臨場的表現馬仔無論係盤球射門及小組都比褔仔好,
所以擺馬仔正選絕對正確.

因為無左盧做中心點所以摩連奴安排球員全部以地波推進,
兼且應有落旨令有空位都要盡量起腳射門.
上半場睇到前面的馬達馬仔連三個基本上係無特定位置, 馬達係右邊及中間做波,
馬仔時係禁區時有拉出亦有跟連調位, 而連就係一貫的到處走位去拉空.

三個中場卒之搵到佢地最適合的位置, 摩連奴先前不斷試人及陣式,
我估佢最頭痡應該係點樣安排普巴及馬迪的位置.
先前有試過普巴及馬迪平排輪流上前或逗後, 雖然馬迪有一定腳法但佢始終唔適宜做
box to box 的工作, 因為佢放波準繩度未算太高, 兼且佢上前的話後面中軸會露出空位.
至於普巴好明顯仍未安裝好防守軟件, 睇到佢防守較上季積極但佢始終好多時會走甩對手.
仲有最大問題係目前全隊控制進攻節奏及做波方面以普巴最好,
若安排佢逗得太後會浪費普巴的進攻能力.

若然要求馬迪盡量逗後以保護後防而普巴要多上前參與進攻咁係中場逼搶方面一定唔夠力量,
摩連奴再嘗試安排普巴及馬迪做返各自最適當的工作然後擺埋靴落去以填補中場的截擊能力.
今場比賽馬迪真係逗係兩個中堅前面去保護中軸及做第一個進攻起點,
以馬迪能力絕對應付自如.
而靴雖然企右邊, 佢除了要幫右閘替工連迪去協防外仲會係中場做逼搶去破壞對方攻勢,
靴即是做返上一季的B2B的工作, 係呢方面佢除了破壞對手傳球外還好多時上前幫手進攻,
兼且亦有久違的三次射門.
係33’靴係對方禁區頂截到波馬上起腳只係高出少許,
52’ 靴入攝小禁區準備接應梳的左邊底線傳中只係慢半步被威廉斯清走.
其實靴有一定的進攻及射門能力,
希望摩連奴不要像雲高爾那樣完全壓抑靴的工作範圍.
普巴企左邊而佢主要工作係策動攻勢及去控制整個進攻節奏,
所以比賽大部份進攻都係左邊發動.
既然普巴防守能力唔算太出色而後面有靴及馬迪去做第一層屏障,
所以普巴既企位係非常接近對方三閘線及禁區.
普巴除了有兩個助攻之外更加多次嘗試自己盤球入禁區而作出四次射門.
從今場睇到普巴越接近對方禁區越能展示佢既強項及能力.
以兩個B2B加一個逗位防中的陣式其實可以做到攻守兼備,
但當然要分工清晰大家有默契互相配合

因華西受傷楊格停賽所以必定要搵替工, 連迪係賓菲加及國家隊除了中堅外亦有踼過右閘,
為要盡快提升連迪安排佢打右閘亦非常合理.
連迪面對保拿斯雖有兩三次被保拿斯高速爆過但佢算係十分拼搏地緊纏對手而未算做成太大威脅,
到下半場連迪基本上已適應對方打法而再沒有給對手機會.
拖肥係失一球後以麥卡菲入替保拿斯去加強攻力.
鐘斯及洛河雖未算頂級中堅及頭鎚唔算太出色,
但佢地出名爛打只要集中精神唔失位係十分穩健的.
例如開賽無耐的23”保拿斯個人突破擺過馬迪成半單刀,
洛河係保拿斯未推過馬迪之前已極速由左邊包去右邊再剷甩保拿斯腳下球.
而鐘斯亦多次化解禁區內的危機.
勉強要彈只係末段70”拖肥放波入去小禁區內的尼亞斯而尼亞斯剛好企係鐘及洛之間,
洛無為意後面有人而鐘稍為慢半秒被尼亞斯頭鎚迎頂幸好柱邊出界.

以現在的後防組合唔應該如先前出現咁多因死球或角球而導致的失球,
史波及拜利頭鎚較好所以問題不大, 而鐘斯及洛河雖頭鎚麻麻但緊身纏撓係佢地強項,
當然好多人一定會把責任推落盧卡古身上, 摩連奴安排最高大的盧返禁區幫手係合情合理,
兼且要打反擊前面還有一班身材更差的連, 米希,. 馬達, 馬仔……..等.
而問題出於盧的first touch實在太差, 兼且佢身型太大隻以致唔夠靈活,
所以凡有一些混亂球彈到落盧身上便會出問題.
一來唔知盧卡古會彈左個波去邊, 另外佢唔夠靈活好難叫佢轉身去搵波然後馬上大腳清走,
所以有三個失球都係看似容易解圍但被對手先搵到波輕鬆射入.
若真係一定要盧回禁區防守不如簡單一點派佢守兩邊門柱,
一來佢身型夠大可以封擋空位二來減少佢搵唔切波的弱項.

今場比賽的整個進攻模式跟以往用長波有好大分別, 之前多次中堅拎到波便大腳清,
中場有波亦係長波放比前面既盧卡古.
現在前面沒有明確目標所以有波通常先由馬迪發動, 佢多數會分比兩邊的梳或馬達,
若係見到普巴沒有被對手緊逼就直接放比普巴由佢運球上前,
上半場可能球員間未有默契所以傳波準繩度不夠而有攻勢但唔入肉,
或好似初段靴直線但馬仔好似無為意而拎唔到個簡單傳球.
有十次射門只係馬達中柱面彈出一球叫中龍,
而下半場調節過後加快走位速度開始由有較多入肉攻勢, 全場21射6中8不中7被封擋.
馬達好多時慣性攝埋中間準備迎波, 所以多數係由梳及普巴去發動攻勢.
梳的狀態開始返黎, 雖有一兩次防守時未能預判對手路線而走甩對手之外,
基本上佢球感完全返哂黎, 尤其係疊瓦走位或做拉扯或自己盤球推上方面,
於27’梳左路推入底線傳人但被碧褔特落地擋出只係曼聯隊友未及衝前執雞,
再之後有一次落底出波但靴攝慢半步而被對方清走.
希望梳係回復狀態之後多做這種動作以填補沒有正宗翼鋒而無突破的弊病.
再加上普巴無後顧之憂所以大部份攻勢都由左邊發動,
普巴的反搶/護球/盤球/長傳能力不用多介紹, 今場佢多次自己盤球入禁區起腳,
37’ 中路熨射剛好柱邊出界
56’ 左邊內切拉射亦係柱邊出界
63’ 亦係左邊盤球射手頂被碧褔特托出底線外
其實普巴若處理得好一點應該有入球.

再講返兩個入球都係由普巴發動地面攻勢而利用小組及默契做成.
57’ 普巴左路盤球把防中舒拉帶離開中軸位置, 普巴見係禁區頂的馬仔有空位馬上傳球,
    馬仔係威廉斯未到之前右腳熨射係碧褔特左手手頂入網.
81’ 普巴繼續係左邊發動交比前面在走位的連, 連推大位先擺過米高堅尼再襯威廉斯未出腳前
    同樣地熨高波係碧褔特左手手頂同一位置入網.
其實係未入第二球前普巴亦係左邊發動而連走向中間,
普巴橫傳連快射地波但碧褔特竟可以快極速落去擋出底線.
呢幾球就係我地一直想睇到的小組配合利用速度及走位入滲做成入球,
呢班球員雖然唔算叫做太高質, 基本的小組入滲應該可以做到.
但之前普巴拎到波後前面係無人走位, 個個都係企係度等波,
一來對手方容易防守, 二來普巴見無人走位焗住上腳帶波除了拖慢節奏之餘
亦有可能被對手拍甩, 之後最終都係要放長波上前比盧卡古.
係咁情況下根本無可能做到入肉攻勢.
若佢地既默契及走位唔係先前咁差雖未必領先鄰居但無可能被拋離15分咁多,
其實先唔好理能否追近鄰居, 但起馬要盡快改善上述弊病以保第二名過終點.

現在人真係得咁多, 想大變都無可能.
盧卡古應該可以月中復出, 另外爆炸據報都係月中, 但狀態肯定唔夠.
華西傷hamstring呢啲又係可大可小, 暫未有復出日期,
呂布膝傷亦係未知日期, 另外拜利要做手術睇怕要季尾至出到,
卡域克應該可以抖到季尾等完約.
而家問題係英超再無弱隊, 若仍排雙防中咁普巴上左前單一個防中應唔夠防守力,
但夾硬要普巴墮後除幫唔到幾多之外前面係唔夠人去做波,
所以餘下英超應該好大機會用返三中場.
至於雙防中可以係盃賽用, 比球員有機會輪換.
明晚足總盃第三圈對打比郡之後要到15號才有英超比賽主場對史篤城,
希望班球員努力再訓練點樣加強默契去增強呢個陣式既威力.

現在二至六位的分數實在太接近, 現階段無法預測曼聯最終排名.
若然大吉不幸失歐聯資格我唔敢擔保摩連奴會否人頭落地.
若摩連奴都無法救曼聯我真係唔知邊個有咁既能力或仲有邊個有料領隊敢過黎奧脫褔.
再引申史高斯前幾日窒摩連奴及普巴的說話, 當然摩連奴的回應係有點過火,
但呢班球員出名EQ差, 若真係出現信心危機好可能每次落場都發波瘟,
咁曼聯就真係可以硬著陸, 所以我支持摩連奴作出反擊以保護一眾球員.
所以希望各位名宿應先考慮各種客觀因素才比意見, 唔好為批評而批評.
當然亦希望摩連奴鬥完咀後係保護球員方面有效果而令佢地重拾信心及鬥志.
起碼要比猶太佬, 贊助商及曼迷睇到就算今季唔得下季都仍有希望,
否則就算猶太佬肯掟錢其他有質素的球員可能怕上錯賊船而唔敢黎奧脫褔.
但翼鋒呢個位置若然有適合的目標應先再做水魚掟錢買到一個為先決,
過左世盃巿場個價錢應該會更加癲.
若然下季仍係無翼鋒做突破及拉邊工作又係死路一條.
::: ......facebook!! :::

返回列表

重要聲明:本討論區是以即時上載留言的方式運作,Hkvwet.com討論區對所有留言的真實性、完整性及立場等,不負任何法律責任。而一切留言之言論只代表留言者個人意見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。Hkvwet.com討論區有權刪除任何留言及拒絕任何人士上載留言 (刪除前或不會作事先警告及通知),同時亦有不刪除留言的權利,如有任何爭議,管理員擁有最終的詮釋權。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。